Оьрсийн меттан версиБашха проекташ
Мотт хийца
РУВИКИ-Х ЛАЬЦНА

А. А. Кадыровн цӀарах йолу 141-ра леррина йолу моторизованни полк

Россин Федерацин Турпалхочун А. А. Кадыровн цӀарах йолу 141-ра леррина йолу моторизованни полк (№ 4156 йолу бӀаьхойн дакъа, «Север» полк, А. А. Кадыровн полк; йоккхуш йолу цӀе – кадыровцаш; оьрс. 141-й специальный моторизованный полк имени А. А. Кадырова) – Нохчийн Республикин пачхьенехь Соьлжа-ГӀалахь йолу Россин Федерацин къоман гвардин эскарийн Къилбаседа-Кавказан гуонан Жуковн орденан кадечу хьаштийн къаьсттина йолчу бригади йукъайогӀу полк.

2006-чу шеран хӀутосург беттан 29-чу дийнахь вовшахтоьхначу 248-чу леррина йолчу моторизованни «Север» батальонах кхоьллина йу полк. 2017-чу шеран гӀуран баттахь дуьйна бӀаьхойн декъан буьйранча М.С. Тушаев ву (2022-чу шеран асаран баттахь дуьйна – подполковник[1]). Нохчийн Республикин Мехк-Да Кадыров Р. А. ларваран гӀуллакхаш а кхочушдо полко.

Истори

248 леррина йолу моторизованни «Север» батальон

2021-чу шарахь Нохчийн Республикин Мехк-Дас Р. А. Кадыровс «Север» батальонах лаьцна: «Кхолларан йуьххьехь лаьтташ Нохчийн Республикин хьалхара Президент, Россин Турпалхо Кадыров Ахьмад-Хьаьжа хилла волу подразделени Россин Федерацин ФСВНГ-н системехь а уггаре а тӀамна кийча йолучарех цхьаъ йу. Кхоьлличхьана сийлахь а, бӀаьхаллин а некъ бина полкан бӀаьхоша. Эзар сов леррина операцеш дӀайаьхьна цо, уьш дӀахьош НВФ-н бӀеннашкахь болчу декъашхойн зуламаш совцийна»[2]. Доьххьара, «Кадыровцаш» Кадыров Рамзана куьйгалла деш йолчу Нохчийн Республикин президентан Кадыров А. А. кхерамзаллин службех олуш дара; Нохчийн Республикин Мехк-Дас Р. А. Кадыровс Ӏуналла а деш, Нохчийн Республикехь йолу ницкъаллин структурийн векалш билгалбохуш а лелайо и термин.

2006-чу шеран хӀутосург беттан 29-чу дийнахь дуьйна схьайогӀуш йу полкан истори[3], цу хенахь Россин чоьхьарчу гӀуллакхийн министран омрица Россин МВД-н чоьхьарчу эскарийн 248-гӀа Къаьстина йолу, леррина йолу моторизованни «Север» батальон кхолла а кхоьллина, тӀеман декхарш кохчушдан а йолайелла, иза Россин МВД-н чоьхьарчу эскарийн Къилбаседа-Кавказан региональни буьйр даран кадечу хьаштийн 46-чу Къаьстинчу бригади йукъайогӀуш йара[4]. «Кадыровцаш» аьлла цӀе йолчу подразделени йукъа Нохчийн Республикин президентан кхерамзаллин службехь хилла болу сотрудникаш схьаэцна. Батальон гӀаролан кхаа ротех а, талламан ротех а, иштта, кхачойаран подразделенех (медицинин взводех, зӀенан, бахаман-техникин кхачойаран) а лаьтташ йара. Батальон чӀагӀамца тӀеман декхарш кхочуш деш болучарех вовшахтухуш йара.

2015-гӀа шо кхаччалц «Север» батальонан (2010-чу шарахь дуьйна – 141-ра леррина йолу моторизованни полк) буьйранча Россин Федерацин Турпалхо, полковник А. С. Делимханов вара.

141-ра СпМП 2009-гӀа шо дӀадаьллачул тӀаьхьа

2009-чу шарахь къаьстина йолчу, леррина йолчу моторизованни «Север» батальонах 141-ра леррина йолу мотризированни полк йина, 2010-чу шеран гурахь дуьйна иза вовшахтоха йолийна кхайкхина баьхкина эскарехь гӀуллакх дечарех[5][6].

2011-чу шеран хьаьттан беттан 10-чу дийнахь Россин Федерацин президентан Указца «Полкан доларчу дӀахӀоттама Даймохк ларабарехь а, тӀеман хьелашкахь пачхьалкхан лаамаш Ӏалашбарехь а турпалалла а, доьналла а, чӀогӀалла а, майралла а гайтарна а, маьршачу дахарехь хьуьнарш гайтарна а» Россин МВД-н чоьхьарчу эскарийн 141-чу леррина йолчу моторизованни полкана «Россин Федерацин Турпалхочун Кадыров Ахьмад-Хьаьжин цӀарах йолу» сийлахь цӀе йелла[7].

2015-чу шарахь 700 бӀаьхо волчу полкан буьйранчин даржехь волчу А.С. Делимхановн метта Р.Р. Абдулкадиров хӀоьттина[8]. 2016-гӀа шо долалуш дуьйна полк йолчу кертахь маьждиг а, кхачо йоллуш кечйина спортан чоь а, кхача бааран чоь а, клуб а, берийн беш а, казармаш а, шайн доьзалшца тӀеман декхарш кхочушдеш берш Ӏаш болу дукхапетарийн цӀенош а ду.

2017-чу шарахь Р. Р. Абдулкадиров шен куьйга кӀелларчаьргара сих-сиха ахчанаш дахар бахьана долуш даржера дӀаваьккхина, тӀаьхьо кхо зуда йийна аьлла бехке а вина иза[9]. 2017-чу шеран гӀуран беттан 20-чу дийнахь цуьнан метта М.С. Тушаев хӀоттийна[10].

Шемахь дӀайаьхьначу тӀеман операцехь дакъалацар

Россис Шемахь дӀахьочу операцехь дакъалоцуш 2018-чу шеран оханан баттахь дуьйна Росгвардин йерриге подразделешна йукъахь а хьалхара йара полк. Шемарчу операцехь дакъалацарна полкан буьйранчина М. Тушаевна «Даймехкан дуьхьа хьуьнарш гайтарна» шаьлтанашца йолу ӀӀ-чу даржан орденан мидал йелла.

Полкан эмблема

Геральдикин билгало — бӀаьхойн 4156-чу декъан эмблема лаха охьатаьӀна кхо са болу, дашо тӀамар йолу турс ду. Турсан таьӀна цӀечу меттигехь — дашо буха тӀе тевжина йолу дашо историн бӀов а, мехкадаьттан вышка а йу, цаьршинна йуккъехь, тӀехьа ирхбирзина мукъ болу дашо шаьлта а, ирхбирзина вовшашна чекхболуш ши чӀу а болуш дашо тӀамар йолу горга турс ду. ЦӀечу баса тӀехь йолчу горгачу турсан баьццарчу меттигехь — неӀарш а, кораш а, тхов а, коьртачу момсар тӀехь беттаса а, лакхахь деши а долуш, тхоьвнаш долу дато шишша минар а йолу дато маьждиг: маьждиг а, минарш а кхаа гӀаьттанан кепехь болчу дато буха тӀехь лаьтта[11].

Фигурин лакхахь лелош геральдикин дашо билгало йу — Россин Федерацин къоман гвардин эскарийн эмблема. Турсана дехьа а, сехьа а — арсаш ирхдирзина долу дашо мукъ болу дато шаьлтанаш, турса кӀеллахь дашочу элпашца йаздина «Россин Турпалхочун А. А. Кадыровн цӀарах» йоза а долуш, хьаьвзина таьӀна-цӀечу басахь аса.

Россин Федерацин къоман гвардин федеральни службин 2020-чу шеран эсаран 15-чу дийнахьлерчу № 405 йолчу омрица тӀечӀагйина йу эмблема.

Полкан куьйгалла а, дӀахӀоттам а

2017-чу шеран гӀуран беттан 20-чу дийнахь дуьйна полкан буьйранчин декхарш кхочушдеш полкан буьйранчин заместитель М.С. Тушаев ву; 2018-чу шеран оханан беттан 5-чу дийнахь дуьйна – полкан буьйранчин даржехь. Тушаев Мохьмад дуьненчу ваьлла 1986-чу шеран чиллин беттан 23-чу дийнахь, 2004-чу шарахь шен ненаца (Оздамирова Сану) Кхарачойн-Чергазийчохь ваьхна; 2005-чу шарахь Нохчийчоьнан малхбузехь йолчу Эна-Хишка йуьртан № 1 йолу йуккъера школа чекхйаьккхина; 2014-чу шарахь ХӀинжа-ГӀалахь (Дагестан) Финансийн а, бакъонан а институт чекхйаьккхина. «Север» полкан буьйранча ша хӀоттавале хьалха, Россин Федерацин къоман гвардин эскарийн федеральни службин «Терек» СОБР-н цхьана подразделенин буьйранча вара. 2018-чу шарахь полкан буьйранчин даржехь а волуш Шемахь тӀеман лерринчу операцехь дакъалаьцна, 2022-чу шарахь дуьйна Украинехь дӀахьочу тӀемашкахь дакъалоцуш ву. Подполковник (2022-чу шеран асаран баттахь дуьйна) М.С. Тушаев Майраллин шина орденан кавалер ву, «Даймехкан дуьхьа хьуьнарш гайтарна» шаьлтанашца йолу ӀӀ-чу даржан орденан мидалца а, Нохчийн Республикин лаккхарчу совгӀатца – Кадыровн орденца а совгӀаташ дина цунна[12]. 2022-чу шеран асаран баттахь Тушаев Мохьмадна «Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин иэсан» мидал йелла[13].

2021-чу шеран хаамашца, М. С. Тушаев буьйр деш 712 бӀаьхо-контрактник а, 75 цхьана ханна тӀеман декхарш кхочушдешверг а вара; 6 бӀаьхо таьӀна-цӀе берет (краповый берет) йолуш а ву.

Билгалдахарш

Комментареш
Хьосташ
  1. ↑ В Грозном наградили отличившихся в ходе спецоперации росгвардейцев. Грозный-информ (2022 шеран 7 июль). ТӀекхочу дата: 2025 шеран 2 сентябрь. Архиван копи 2022 шеран 7 июлехь дуьйна Интернетан архив#Проекташ
  2. ↑ Р. Кадыров поздравил 141-й специальный моторизованный полк имени Героя России Ахмата-Хаджи Кадырова с 15-летием. chechnya.gov.ru (2021 шеран 15 июнь). ТӀекхочу дата: 2025 шеран 2 сентябрь. Архиван копи 2021 шеран 15 июнехь дуьйна Интернетан архив#Проекташ
  3. ↑ Полк имени Героя России Ахмата-Хаджи Кадырова грозненского соединения Росгвардии отметил 15-ю годовщину со дня образования. rosguard.gov.ru. ТӀекхочу дата: 2025 шеран 2 сентябрь.Архиван копи 2022 шеран 13 майхь дуьйна Интернетан архив#Проекташ
  4. ↑ Они из батальона «Юг». old.redstar.ru. ТӀекхочу дата: 2025 шеран 2 сентябрь.Архиван копи 2022 шеран 2 апрелехь дуьйна Интернетан архив#Проекташ
  5. ↑ Первые новобранцы приняли воинскую присягу. ТӀекхочу дата: 2025 шеран 2 сентябрь. Архивйина 2014 шеран 7 апрелехь
  6. ↑ Рамзан Ахматович Кадыров. ТӀекхочу дата: 2025 шеран 2 сентябрь. Архивйина 2014 шеран 7 апрелехь
  7. ↑ Высокие награды за мужество и героизм. grozniy.bezformata.com. ТӀекхочу дата: 2025 шеран 2 сентябрь. Архиван копи 2022 шеран 2 июнехь дуьйна Интернетан архив#Проекташ
  8. ↑ Герой России Делимханов назначен замкомандира 46-й бригады ВВ МВД РФ. ria.ru (2022 шеран 13 февраль). ТӀекхочу дата: 2025 шеран 2 сентябрь.Архиван копи 2022 шеран 13 февралехь дуьйна Интернетан архив#Проекташ
  9. ↑ Бывшего командира чеченского батальона «Север» обвиняют в убийстве трех женщин. stolica-s.su (2022 шеран 13 февраль). ТӀекхочу дата: 2025 шеран 2 сентябрь. Архиван копи 2022 шеран 13 февралехь дуьйна Интернетан архив#Проекташ
  10. ↑ Магомед Тушаев назначен командиром полка «Север» им. А-Х. Кадырова. ТӀекхочу дата: 2025 шеран 2 сентябрь. Архивйина 2022 шеран 13 февралехь
  11. ↑ 141-й специальный моторизованный полк имени Героя РФ Ахмата-Хаджи Кадырова «Север» Росгвардии (в/ч 4156, Грозный. geraldika.ru. ТӀекхочу дата: 2025 шеран 2 сентябрь. Архиван копи 2022 шеран 15 январехь дуьйна Интернетан архив#Проекташ
  12. ↑ Магомед Тушаев назначен командиром полка «Север» им. А-Х. Кадырова. chechnyatoday.com. ТӀекхочу дата: 2025 шеран 2 сентябрь. Архиван копи 2022 шеран 13 февралехь дуьйна Интернетан архив#Проекташ
  13. ↑ Рамзан Кадыров наградил военнослужащих из ЧР, отличившихся в деле защиты интересов Отечества. vesti95.ru (2022 шеран 7 июль). ТӀекхочу дата: 2025 шеран 2 сентябрь.Архиван копи 2022 шеран 7 июлехь дуьйна Интернетан архив#Проекташ

Хьажоргаш

Кхин дӀа темана тӀехь

Категореш