Ойсхарара рузбан-маьждиг
Кадыров Сулиман цӀарах долу Ойсхарара рузбан-маьждиг (оьрс. Джума-мечеть Ойсхара имени Сулима Кадырова — маьждиг Ойсхара гӀалахь ду, Гуьмсан кӀоштарчу Ойсхара гӀалин йуккъерчу майданахь ду иза. Коьртачу маьждиг чу пхийтта эзар бусалба стаг тарло[1].
Истори
Ойсхара гӀалара шира рузбан-маьждиг 1998-чу шарахь дина ду. 2017-чу шеран йуьххьехь ширачу маьждиг чу кхачам боллуш адам ца тарло аьлла, меттигерчу бахархоша шайна керла маьждиг дар дийхира Нохчийн Республикин Мехк-Дега. 2017-чу шеран хӀутосург баттахь Ойсхара гӀала вахана волчу Нохчийн Республикин Мехк-Дас Кадыров Рамзана тӀедиллира цигахь керла больница а, маьждиг а, спортан комплекс а йар[2].
Ши де даьллачул тӀаьхьа республикин Мехк-Да комплекс йар дӀадолорехь дакъа а лоцуш, йуха а вахара оцу гӀала. Бутт гергга хан йаьллачул тӀаьхьа, асаран беттан 7-чу дийнахь 5000 стагана лерина маьждиг дар дӀадолорехь дакъалаца а вахара иза[3]. Кадыров Сулиман цӀе лелош ду и маьждиг.
Кадыров Рамзанан тайпанах волу динан гӀуллакххо Кадыров Сулим берашна Къуръан Ӏамош ву аьлла, махкахваьккхина Гулаге вахийтина, цигахь дейтта шо даьккхинчул тӀаьхьа Казахстане дӀахьажийна[4].
Даздаран хьолехь маьждиг схьаделлар дӀадаьхьна 2020-чу шеран хьаьттан беттан 21-чу дийнахь Нохчийн Республикин хьалхара Президент Кадыров Ахьмад-Хьаьжа дуьненчу ваьлла 69 шо кхачарна лерина[5].
ГӀишлойар а, сурт хӀоттор а
Маьждиг йуккъерчу азин хотӀехь дина ду, иза дарехь дакъалоцуш Узбекистанера художникаш а, говзанчаш а бара. Бухарски хотӀехь дина долу Шела гӀалара «Бусалбанийн дозалла» маьждигах тера догӀуш дина ду и рузбан-маьждиг. Коьрта гӀишло кхаа агӀор П-кепара чугӀойла долуш йу. Маьждиг йиъкӀов кепехь ши гӀат йолу гӀишло йу. Маьждиг бетонан монолитах дина а, коьрта ярус йоцург балконаш йолуш а ду. Мокхаз а, туркойн мармар а йукъарадаьккхича и гӀишло йеш российски гӀишлошйаран гӀирсаш бен лелийна бац[6].
Ойсхаран рузбан-маьждиг 4 гектар майданахь дина ду, гонахара меттиг а лерича цига 15 эзар стаг тарвала аьтто бу. Йуккъерчу маьждиган тхов дешица кхелина бу, маьждиган маьӀигашкахь ирах йоьдуш 36 метр лекха йиъ мимар йу. Маьждиган ламазан коьртачу чоьнна тӀехула тиллина боккха тхов бу. Йуккъерчу чоьнан тховна кӀелахь йоккха люстра йу, чохь серло латторан система хаза сурт хӀоттош, маьждиган интерьеран дизайнаца дика йогӀуш йу. Чухула гипс тухуш, дешица, басехьчу йозанашца (Каллиграфи) хаза кечбина бу тхов. Динан объект кхузаманан аккустикин система хӀоттийна йу[7]. Маьждиган гена йоццуш ламаз оьцу гӀишло а йу[8].
Галерей
Билгалдахарш
- ↑ Мечеть на 15 тысяч человек открыли в поселке Ойсхара. grozny.tv. ТӀекхочу дата: 2025 шеран 16 сентябрь.
- ↑ Мечеть на пять тысяч человек построят в п. Ойсхара Гудермесского района ЧР. chechnya.gov.ru. ТӀекхочу дата: 2025 шеран 16 сентябрь.
- ↑ В Чечне заложили капсулу в основание еще одной мечети. regnum.ru. ТӀекхочу дата: 2025 шеран 16 сентябрь.
- ↑ В посёлке Ойсхар открылась мечеть имени Сулима Кадырова на 15 тысяч молящихся. chechnya.gov.ru. ТӀекхочу дата: 2025 шеран 16 сентябрь.
- ↑ Новую мечеть открыли в Чечне. ТАСС. ТӀекхочу дата: 2025 шеран 16 сентябрь. Архивйина 2020 шеран 23 августехь
- ↑ В поселке Ойсхара торжественно открыли новую мечеть. ИА Чечня Сегодня. ТӀекхочу дата: 2025 шеран 16 сентябрь. Архивйина 2021 шеран 15 январехь
- ↑ Мечеть имени Сулима Кадырова (п. Ойсхара). arispro.ru. ТӀекхочу дата: 2025 шеран 16 сентябрь. Архивйина 2021 шеран 22 августехь
- ↑ В Ойсхаре открылась мечеть на 15 тыс. человек. grozny-inform.ru. ТӀекхочу дата: 2025 шеран 16 сентябрь. Архивйина 2021 шеран 29 октябрехь
