Делимханов, Шарип Султанан кӀант

Султанан кӀант Делимханов Шарип дуьненчу ваьлла 1980-чу шеран оханан беттан 23-чу дийнахь Нохч-ГӀалгӀайн АССР-н Гуьмсан кӀоштарчу Жалкха йуьртахь^[1][2][3]. 1997-чу шарахь Жалкхара лоьмар 1 йолу йуккъера школа чекх а йаьккхина, Нохчийн пачхьалкхан университетан историн факультете деша вахана^[1][2][3].

1999-чу шарахь дуьйна болх беш ву Нохчийн Республикин чоьхьарчу гӀуллакхийн органашкахь — Нохчийн Республикин президентан Кадыров Ахьмад-Хьаьжин кхерамзаллин службин белхахо^[1][2].

2002-2003-чуй шерашкахь Россин Федерацин эскарехь гӀуллакхдеш хилла^[1][2].

2004-чу шарахь дуьйна Ведомствийн йоцучу гӀаролин Урхаллин милицин полкехь (УВО МВД по ЧР) вара^[1][2]. Террористашна дуьхьал дӀайаьхьначу дуккха а йолчу лерринчу операцешкахь ша дакъа а лаьцна, куьйгалла а дина^[1][2].

Чоьхьарчу гӀуллакхийн министерствехь милицин белхахочун даржехь болх бан волавелла, тӀаьхьо взводан буьйранча а, цул тӀаьхьа ротин буьйранча а хилла^[1][2]. 2006-чу шарахь Нохчийн Республикин чоьхьарчу гӀуллакхийн министерствон мехкадаьттан а, газан а комплекс йарйарехула йолчу милицин полкан буьйранча хӀоьттина^[1][2].

2016-чу шарахь Къоман Гвардин эскарийн Нохчийн Республикехула йолчу Урхаллин хьаькаман дарже хӀоьттина^{[1][2][4][5][6]}.

2017-чу шарахь Россин Президентан Путин Владимиран указца полицин инарла-майоран цӀе йелла цунна^[1][2][7].

2019-чу шарахь «Менеджмент» говзалла кара а йерзош, цӀечу дипломаца Россин чоьхьарчу гӀуллакхийн министерствон урхаллин академи чекхйаьккхина^[1][2].

Россин Пачхьалкхан Куьйгалхочун 2020-чу шеран асаран беттан 5-чу дийнахьлерчу указца йуха а Росгвардин Нохчийн Республикехула йолчу Урхаллин хьаькаман дарже дӀахӀоттийна^[1][2], оццу указца эскархочун «инарла-майор» цӀе а йелла

• Ваша — Султанан кӀант Делимханов Адам — российски пачхьалкхан гӀуллакххо. Нохчийн Республикин правительствон председателан заместитель (2006—2007), Россин Пачхьалкхан Думин V-чу а, VI-чу а,VII-чу а гуламийн депутат, «Единая Россия» партин декъашхо. Пачхьалкхан Думин VII-чу гуламехь — Пачхьалкхан Думин кхерамзаллехула а, коррупцина дуьхьало йарехула а йолчу комитетан декъашхо.

• Ваша — Султанан кӀант Делимханов Ӏалибек — Россин Федерацин къоман гвардин Федеральни службин директоран гӀоьнча, инарла-полковник, Россин Федерацин Турпалхо (2009).

• Ваша — Султанан кӀант Делимханов Амхьад — Нохчийн Республикехула йолчу чоьхьарчу гӀуллакхийн министерствон инспекцин коьрта инспектор.

2022-чу шеран мангалан беттан 21-чу дийнахь Евросоюзан санкцешна йукъа вахийтина. 2022-чу шеран хӀутосург беттан 6-чу дийнахь Канадин санкцешна йукъа вахийтина^[8][9]. Швейцарин а, Украинин а, Японин а санкцешна йукъахь ву.