Ахьмад Арена

2004 шарахь Российн президента Путин Владимира тӀедилларца, финансаш йелла Кадыров Ахьмадан цӀарах Центран стадион^[1] ян. Проектан-сметан документаци йира 2005 шарахь^[2]. Стадион ян йолийра 2006 шарахь, йира пхеа шарахь гергга, и болх дӀабаьхьира Федералан Ӏалашон программица. 2011 шеран бӀаьста эксплуатаци дӀаделла спорткомплексан коьрта дакъа — 30 эзар меттиган спортан арена. Спорткомплекс ю хӀокху заманан архитектурехь, ярца а, проектаца а уггаре дикачех цхьаъ Российн ерриг къилбехь. Белхаш дӀабаьхьира УЕФАн а, ФИФАн а стандарташца.

Стадион тӀаьхь ю малхбуза трибуна А 9 эзар меттиган, малхбален Б 21 эзар меттиган, заьӀапхойн меттигаш а ю кечйина. «Ахьмат Аренехь» хӀоттийна аналоган видеотергонан система. Ерриг спорткомплексна тӀаьхь хиттийна 432 камера, царех 9 — урхалла данлуш ю.

«Ахьмат Арена» дӀайиллира 2011 шеран 11 майхь. Стадион дӀаелларан программан йукъайогӀура лазеран шоу а, нохчийн а, дуьненан а эстрадан гӀарабевлла артистийн ловзарш — Си Си Кэтч, Тото Кутуньо, Аль Бано, Крейг Дэвид. Дуьххьарлера матч хилира оццу дийнахь: арене елира команда «Кавказ» а, цунна йукъахь левзира Кадыров Рамзан, Каноков Арсен, Исаев Никита, Дасаев Ринат (коьрта тренер вара Российн президентан юьззина бакъонаш йолу КЪСКФО векал, Хлопонин Александр), куьйгаллехь Марадона Диего волу «дуьненан гулйина команда», цунна йукъахь левзира йукъара бевлла гӀарабевлла футболисташ — Франческоли Энцо, Фигу Луиш, Барези Франко, Костакурта Алессандро, Саморано Иван, Бартез Фабьен, Папен Жан-Пьер, Фаулер Робби, кхин а. Команда «Кавказ» туьйлира жамӀ 5:2^[3] долуш. 2011 шеран 20 майхь стадион тӀаьхь хилира российн футболан премьер-лиган хьалхара официалан матч. Соьлжа-ГӀалара «Терк» толам баьккхира «Анжигара» — 1:0.

2012 шеран 31 майхь стадион хилира Европин стадионийн ассоциацин а, кхерамазаллин а (ESSMA) декъашхо^[4]. 2012 шеран ноябрехь стадион йукъайахна уггаре дукха нах оьху бӀе футболан стадионашна. «Ахьмат Аренин» тӀе юккъера барам 19 572 хьажархо вогӀуш «Терк» рейтингехь 88-гӀа могӀане йаьлла^[5].

• 2011 шеран 7 августехь «Терк» — «Спартак» (Москох) матчан 79-гӀа минотехь цӀеххьана дӀаелира серло. Матч сацийра, цул тӀаьхьа 50 минот йаьлча ловзар карладаьккхира^[6].
• 2013 шеран 1 июнехь стадионо тӀеийцира 2012/2013 шерийн Российн Кедан финал, цхьаьнакхийтира ЦСКА а, «Анжи» а. Матч дӀайаьлча пенальтеш тоьхна туьйлира москохой.
• 2014 шеран 6 июлехь стадион тӀаьхь WBA версица безачу барамехь рожера дуьненан чемпион дарж къовсуш летира Чагаев Руслан а, Окендо Фрес а, Чагаевн толамца чекхделира иза^[7].