Текстильщик (футболан клуб, Иваново)

Футболан шен дӀадолор ду Ивановохь 1909 шарахь дуьйна. Цул тӀаьхьа дуьххьара вовшахтоьхна матчаш дӀайаьхьира Иваново-Вознесенскехь, ткъа 1912 шарахь (Йерригроссийн футболан союз кхоьллина шо) Иваново-Вознесенск тобано шен дуьххьарлера матч левзира, 1912 шарахь эшийра шен лулахой Кохма гӀалара 21:0 чоьтаца.

1920-гӀа шерашкахь жигара кхоллайелира футболан тобанаш текстилан фабрикашкахь. 1923 шарахь Иваново-Вознесенск гӀалин тобано дакъалецира Москохахь дӀайаьхьначу футболан турнир 1-ра Йерригсоюзан физоьздангаллин фестивалан гуранахь. 1/8 финалехь Ивановон тоба эшна хӀусамдайшна 0:7 жамӀаца.

Цул тӀаьхьа Иваново-Вознесенск хаддаза дакъалоцуш йара тайп-тайпанчу йерригсоюзан а, йерригроссин а къовсамашкахь, дуккха а дуьненайукъара матчаш дӀахьош йара. 20-гӀа шераш чекхдовлуш а, 30-гӀа шераш долалуш а гӀала йеара Латвера а, Финляндера а, Норвегера а, Ингасчуьра а, Германера а белхан тобанаш. Ивановера футболан лакхара мах хадийра махкахь. 1933-чу шарахь, дуьххьара махкахь «33 тоьлла» футболистийн тептар хӀоттийча, цу юкъа 6 Ивановхо вахара. Историн толам Туркойчоьнан къоман командин тӀехь баккхаро доккха дакъа лецира Ивановон футболан ишкол къобалйарехь. Советийн пачхьалкхехь гастролашкахь лелаш, туркой эшийра Москохан тобано, Ленинградехь цхьан а ца туьйлира, эшийра ССРС къоман тоба. ТӀаьххьара а, сацам болуш а матч хилира Ивановохь 1933 шеран 3 августехь. ЦӀерачу тобано, «Динамо» стадионехь (хӀинцалера «Текстильщик» стадион) гулвеллачу 30 эзар хьовсархочун гӀоьнца, толам баьккхира 7:3 жамӀаца. ХӀетахь гӀалин тобанан бух лаьтташ бара Ивановора «Динамон» спортхойх - махкахь уггаре а нуьцкъала хьошалгӀа баьхкинчу спортхойх дуккха а бара цу тӀехь ловзуш. Оццу шарахь официалан йоцчу матчехь махкахь уггар нуьцкъала тобанан цӀе йаккхархьама Ивановора тоба эшна Москван тобанна 3:4 жамӀаца.

1934 шарахь Ивановохь дӀабаьхьира Российн 10-гӀа чемпионатан чаккхенан мур. Шайн тобанехь Свердловскан а, Новосибирскан а тобанаш эшийна, эххар а шолгӀа меттиг йаьккхира Ивановон тобано, Воронежера тобанна эшна. ШолгӀачу шарахь Ивановон тоба сецира ССРС чемпионатан 1/2 финалан муьрехь. Амма оцу хенахь тобанан хӀоттам гӀелбеллера. 1936 шарахь спортан йукъараллаш йукъахь хьалхара ССРС чемпионатехь йацара Ивановон команда. Меттигера «Динамос» хьалхара меттиг дӀайаьккхира «Спартаках» - и команда йара рогӀерчу шарахь йерригсоюзан аренехь гайта йолаелларг.

«Текстильщикан» футболан ишкол кхоьллина 1973 шарахь. Дуьххьарлера директор вара Скрипачёв Геннадий Михайлович^[3]. Цуо цхьаьна левзина ваьллачу Бутов Владимирца болийна тренеран болх.