Ихьрам

Оцу хьолехь дихкина ду дуьненан дахарца доьзна долу йохк-эцар а, гӀуллакх а лелор; эвхьаза йукъаметтигаш лело, иштта зуда йеха а, йа захало дан а; оьгӀазваха а, цхьанна вас йан а; муьлххачу а садолчу хӀуманна зен дан а (акхарой а, сагалматаш а дайа, ораматийн гаьннаш а, буц а дӀайаккха, дитташ тӀера гӀаш а, гаьннаш а схьадаха, и. дӀ. кх. а); месаш а, мекхаш а дӀадаха, хаза хьожа йогӀу хӀуманаш лело, ювелиран хӀуманаш лело, кӀур баккха. Дуьззина лийчар (гӀусл(оьр.)нохч.) дӀадаьккхинчул тӀаьхьа, зударша паргӀат кӀайн бедарш тӀейуху, коьрта тӀе йовлакх дӀахьулдо, йуьхь а, куьйгаш а, когаш а бен гуш ца хуьлуш. Божарша тӀедуху цхьалха ши кӀайн пардо: цхьаммо цӀонгин тӀера дуьйна голаш хьулйеш настарш дӀакъовлу, важа аьрру белш тӀехула кхуссу. Оцу духарша билгалдоккху хьаьжойн ойланаш цӀена хилар а, Веза-Воккхачунна хьалха уьш цхьатерра хилар а. ХьаьжцӀа баьхкинчу наха шайн ихьрам духар тӀедухучу меттигах микъат олу, иза КаӀбатна йиъ километр генахь ю. ХӀинцалерчу заманахь дуккха а зийартхоша хьалххе, кеманна тӀе ховшале хьалха, тӀедуху ихьрам. Ихьрам гатанах дина хуьлу, иза довха а , шийла а хуьлу. Нагахь санна эвхьаза меттиг гучуйалахь хьаьжхочуьнгара цхьа уьстагӀ гӀуда догӀу.