Оренбург (футболан клуб)

«Оренбу́рг» — изза цӀе йолу гӀалара российн футболан клуб. Кхоьллина 1976 шеран 1 январехь. 2016/17 шо кхачале командин цӀе хилла «Газовик». 2014/15 шарахь Россий Кедан ахфиналхо.

Мехкан хьалхейаккхарехь дебют хилла 1976 шарахь, цигахь «Газовико» хийцина ССРС чемпионатан шолгӀачу лигехь кхин оренбурган клуб — «Локомотив». Оцу турнирехь левзина ворхӀ шарахь, 1983 шарахь команде заявка ца йала йелира керла шерна, 1989 шо кхаччалц левзина КФКахь. Вукха шарахь левзина шолгӀачу лигехь, амма аьттунаш ца боха, турниран таблицин лахахь хуьлу: йуьхьанца пхийттолгӀа меттиг, цул тӀехьа берхӀийтталгӀа меттиг.

Российн хьалхара чемпионат дӀайаьхьира шолгӀа лигехь, ткъа 1993 шарахь баьккхира тӀаххьара меттиг, охьайелира кхоалгӀа лиге, цигахь левзира деа шарахь. КхоалгӀа лига жимйинчул тӀаьхьа 1998 шарахь, «Газовик» йуха а хьалайелира шолгӀачу дивизионе («Урал-Ийдалйист зона»), цигахь левзина 2010 шо кхаччалц. 2006, 2007, 2008 шерашкахь команда хилира шолгӀа лигин детин совгӀатхо, ткъа 2006 а, 2008 а шерашкахь хьалхара дивизионе йала таро йара спортан йоцучу мукъмашца, цхьа команда цхьацца бахьнашца йукъарайалар бахьнехь. Оцу хӀуманах дӀахедира спонсораш ООО «Газпром добыча Оренбург», кхин а гӀалин а, областан а куьйгалла^[2]. Аьтту хиллачул тӀаьхьа ловзар дуьйжира, 2009 шарахь командо йаьккхира ворхӀалгӀа меттиг. Цуьнан бех бара кадраш хийцар: директор хийцира Калякин Юрийца, ткъа керла коьрта тренер хилира Галкин Константин. Шо доладалале хьалха тӀом бан хьуьнар долу коллектив кхоьллира, аьтту белира дуьххьар шен исторехь «Урал-Ийдалйист» зонин чемпион хила, иштта ФНЛ хьалайелира.

ФНЛ 2011/12 хьалхара шо дехьайларан хилира, чемпионат йира кхо гуо болуш: 2011 шеран жамӀаца мукъа ваьккхира коьрта тренер, иза хийцира Евдокимов Роберта. КхоалгӀачу гуонан цхьайтта мачехь ворхӀ толам, кхаа матчех цхьа а ца тоьлла, ткъа цхьаъ бен боцу иэшам комадин беина калининградан «Балтико» шайн аренехь оренбургхой иэшийра 2:1, цуьнца цхьаьна клуб шолгӀачу дивизионе хьажийра; йаьхна очкош а, толамаш а цхьа терра долуш, «Газовик» ийшира вовшашца ловзарца. Куьйгалло хӀоттийна Ӏалашо ФНЛ йухайерза кхочуш йира, 2013/14 шо оренбурган коллективо долийра ФНЛ. ХӀинца команда дика ловзура: хьалхий-тӀехьийн комадо йаьккхира ФНЛ пхоьалгӀа меттиг. Кхин а 2015 шарахь командо баьккхира уггаре лакхара меттиг Кедан исторехь, кхечира турниран ахфинале, цигахь ийшира москохара «Локомотивал» (1:1; 3:4 пен.). Кхин а шо даьлчи «Газовик» хилира «ФНЛ Кедан» толамхо — Ӏаьнан шерал хьалхара турнир.