Бурчаев, Хьалим Хьасанан воӀ

Бурчаев Хьалим вина Кхазакхстанехь, нохчийн къам махкахдаьккхинчу муьрехь. Нохч-ГӀалгӀайн АССР меттахӀоттийначул тӀаьхьа, доьзал дуьххьара Даймахка цӀабирзина, ткъа ша винчу Йалхой-Мохк олучу йуьрта ишколе вахара^[2]. Доьзалехь 15 бер дара, ткъа Хьалим иссалгӀа бер дара^[3][4].

1980 шарахь Бурчаевс Нохч-ГӀалгӀайн пачхьалкхан университетан филологин факультетан къоман отделени чекх а йаьккхина, шен дай баьхначу йуьртахь нохчийн меттан а, нохчийн литературин а хьехархочун болх бан волавелира^[2]. Цо вовшахтоьхна ишколан литературни кхеташо йерриге а республикехь гӀарайелира. Кхеташонан декъашхоша йаздо дийцарш а, байташ а кӀоштан а, республикин а зорбанехь арайовлура^[2][3]. 1997 шарахь иза хьеха волавелира Орза-ГӀалин йуккъера ишколехь^[2]. Цуьнан куьйгаллица Оьрза-ГӀалин ишколехь дешархой нохчийн меттан олимпиадашкахь совгӀаташ даха буьйлабелира^[3].

1990-чу шерашкахь «Даймохк» газетан корреспондент вара иза. Бурчаев ишколехь доьшуш волуш волавелира ша литературехь зен, амма литературин некъ леррина тӀелаьцна университетехь. 1977-чу шарахь цуьнан дуьххьарлера стихаш зорбанейевлира республикин «Ленинан некъ» газетехь. 1980-чу шерашкахь оццу газетехь арайовлу цуьнан дуьххьарлера статьяш а, дийцарш а^[5].

2006-чу шарахь дуьйна Российн Йаздархойн союзан декъашхо ву, ткъа 2007-чу шарахь дуьйна — Журналистийн союзан декъашхо. 2004-чу шарахь «Орга» журналан критикан отделан редактор хӀоьттира иза, ткъа 2009-чу шарахь оцу журналан коьртачу редакторан заместитель. Иштта «Грозный» телерадиокомпанехь гочдархочун болх бина, Гуьмсерчу хьехархойн техникумехь а, Нохчийн пачхьалкхан университетехь а нохчийн литературин историн хьехархочун болх бина. Цо нохчийн матте гочйина Ильфан а, Петровн а, Сулейманов Ольжасас а, Мугуев Хьаьжи-Муратан а, Павленко Пётран а, Гамзатов Расулан а, иштта кхечу гӀарабевллачу йаздархойн говзарш. Иштта цо болх бо Нохчийн Республикин Ӏилманийн Академино арахоьцучу «Таллам» (оьрс. Исследование) журналан жоьпаллин секретаран даржехь^[6].

2026-чу шарахь Соьлжа-ГӀалахь, Абузар Айдамировн цӀарах йолчу Нохчийн пачхьалкхан къоман библиотекехь «Бенойн БойсагӀар» роман зорбане йаьккхинчу хьокъехь дӀайаьхьира презентаци^[7].

Бурчаевн произведенеш арайовлу республикан зорбанехь а, «Орга» а, «Вайнах» а, «Нана» журналашкахь а, Нохчийн Республикин Ӏилманийн Академин керланаш тӀехь а, Ӏилманан-практически конференцийн гуларшкахь а^[8].

• Нохчийн Республикин хьакъволу журналист (2008)^[6];
• «Зорбанан зорбанан гӀирсаш а, интернет а» декъехь нохчийн маттахь йаздечу журналисташна йукъахь дӀайаьхьначу республикин конкурсан толамхо (2012)^[9];
• Нохчийн Республикин халкъан йаздархо (2022)^[10];
• Нохчийн мотт хаарийн республикин конкурсан толамхо (2023)^[11].