Межидов, Вахьид Хьумайдан кӀант
Межи́дов Ва́хьид Хьума́йдан кӀант (оьрс. Вахид Хумаидович Межидов; 1938 шеран 29 апрель, Курчалойн кӏошт, Нохч-ГӀалгӀайн Автономин Советийн Социалистийн Республика — 2025 шеран 30 июль) — россин Ӏилманча а, химин Ӏилманийн доктор а, профессор а, кхоллархо а, Нохчийн Республикин Ӏилманийн академин академик а[1].
Биографи
Дуьненчу ваьлла 1938-чу шеран оханан беттан 29-чу дийнахь Нохчийн Республикин Курчалойн кӀоштарчу БӀачи-Йуртахь. Халкъаш махках даьхначу муьрехь 1956-чу шарахь чекхйаьккхина Киргизски ССР-н Таласан областерчу Покровскан йуккъера ишкол.
1957-чу шарахь даймахка цӀа вирзина. 1962-чу шарахь чекхйаьккхина механически факультет Соьлжа-ГӀалин мехкадаьттан институтехь. Соьлжа-ГӀалин мехкадаьттан институтан физикин кафедрехь ассистентан болх бина.
1968-чу шарахь «Гидравлика а, инженерни гидрологи а» говзаллехула кандидатан диссертаци чӀагӀйина[2][3]. 1972-чу шарахь физикин кафедран доцент хӀоьттина.
1989-чу шарахь «Физически хими» говзаллехула докторан диссертаци чӀагӀйина. 1991-чу шарахь физикин кафедран профессор хӀоьттина. 1992-чу шарахь Нохчийн Республикин Ӏилманийн академин баккъал волу декъашхо хаьржина.
1993-чу шарахь республикера хьал чолхе долчу хенахь Владимиран политехникин институтан Муромски филиалан физикин кафедрехь куьйгалла дина. 1995—1996 шерашкахь Соьлжа-ГӀалин мехкадаьттан институтан ректор хилла, жигара дакъалаьцна иза меттахӀотторехь.
Россин Ӏилманийн академин А. В. Топчиевн цӀарах йолчу нефтехимически синтезан институтан РАӀ хьалхарчу белхахочун болх бина. ТӀаьхьо, нанотехнологешца а, наноматериалашца а Ӏилманан белхаш бан волавелира иза.
Ӏилманан бӀе гергга статья зорбане йаьхна, хӀума йарна авторски ворхӀ тоьшалла а делла, Ӏилманийн йалх кандидат кечвина. Республикин а, федеральни а зорбанан изданешкахь иттаннашкахь арайевллачу йукъараллин-политикин а, литературин а публикацийн автор ву.
Соьлжа-ГӀалин мехкадаьттан техникин университетехь йолчу «Нанотехнологи а, наноматериалаш а» белхан тобано пайда оьцучу Ӏилманан-талламан туьшан директор вара[1].
Межидов Вахьид велла 2025 шарахь мангалан беттахь 30-чу дийнахь[4].
Библиографи
- Межидов Вахид Хумаидович, Висханов Салман Саламович, Даудова Аманта Леонидовна. Химический состав и некоторые свойства бентонита месторождения Катаяма (Чеченская Республика) // Известия высших учебных заведений. Северо-Кавказский регион. Технические науки. — 2013. — № 4 (173).
- Даудова Амант Леонидовна, Межидов Вахид Хумаидович, Висханов Салман Саламович. Кислотная модификация бентонитов различного химического состава // Известия высших учебных заведений. Северо-Кавказский регион. Технические науки. — 2015. — № 1 (182).
СовгӀаташ а
- Россин Федерацин говзаллин лакхарчу дешаран сийлахь белхахо[5];
- Нохч-ГӀалгӀайн АССР-н Ӏилманан сийлахь гӀуллакххо;
- Дипломаш а, грамоташ а, мидалш а.
Доьзал
Зуда йалийна ву. Ши йоӀ а, ворхӀ берийн бер а ду.
Билгалдахарш
- ↑ 1 2 Межидов Вахид Хумаидович(оьр.), Академия наук Чеченской Республики. Дата обращения: 14 майхь 2026.
- ↑ Тернистый путь к большой науке (к 75-летию доктора химических наук, профессора Межидова Вахида. www.research-journal.org. ТӀекхочу дата: 2026 шеран 14 май.
- ↑ Межидов В. Х. Исследование истечения жидкости из внутренних цилиндрических насадков диссертация ... кандидата технических наук : 05.00.00. www.rusneb.ru. ТӀекхочу дата: 2026 шеран 14 май.
- ↑ Ушел из жизни известный ученый Вахид Межидов. www.grozny-inform.ru. ТӀекхочу дата: 2026 шеран 14 май.
- ↑ Сегодняшний пост-рубрику о #нашихвыдающихсявыпускниках хотим посвятить Вахиду Хумаидовичу Межидову (2024, 12 сентябрь). Дата обращения: 14 майхь 2026.