Джигитан де

Джигит бакъдолу доьналла а, Даймахкана тешаме хилар а гойтуш хуьлуш ву. Ткъа оцу дезчу дийно чӀагӀдо оцу амалийн мехалалла а, маьӀна а, шайн доьзалашна а, Даймахкана а бакъболчу къонахаш боккха ларам беш, шаьш сий долу чекхбовлуш хилар а гойтуш.

Джигитан де — мелла а къона дезде ду, амма цуьнан орамаш бӀешерашка дӀадоьлху, Къилбаседа Кавказан къаьмнийн шира ламасташ а, культурин башхаллаш а гойтуш. И де хӀотторан ойла гучуйелира XX бӀешо чекхдолуш — XXI бӀешо долалуш, Нохчийчоьнан а, ГӀалгӀайчоьнан а йукъаралло политикин а, йукъараллин а карчамаш хиллачул тӀаьхьа жигара къоман гӀиллакхаш а, ламасташ а дендан долийча^[2].

Джигитан де дуьххьара билгалдаьккхира 77 шо хьалха Пятигорскехь. Вайн республикехь и ламаст дукха хан йоццуш карладаьккхира, цуьнца цхьаьна дезчу дийнан керла элементаш юкъаялийра.^[3]

Оцу дийнахь Димаев Ӏумаран цӀарахчу кӀоштан культурин цӀийнан культурин белхахоша вовшахтуху патриотически синхаам лакхабаккхаран а, къоман культурин ламасташ лардаран а, кхиоран а Ӏалашонца мероприятеш, шайна юкъахь къийсадаларш а, турнираш а, ницкъ а, каде хилар а гайтаран къийсадаларш а долуш.

Кхин кӀезиг мехала дац мукъамашца, хелхаршца, эшаршца цхьаьна дӀахьош долу халкъан даздарш. Ишттачу дезчу деноша тайп-тайпана нах вовшахтуху, баккхийчарна шайн хаарш а, зеделларг а кегийрхошна дӀадала аьтто а беш. Къоначу декъашхойн аьтто бу шайн дог-ойла йовзийта а, шайн хьуьнарш гайта а, баккхийчеран хьекъал шайна чуэца а.

Иштта, ламастан мехаллаш а, гӀиллакхаш а лардарца доьзна хаттарш дийцаре дан меттиг хуьлу Джигитан де. Йукъараллин а, динан дайн а векалша цхьаьнакхетарш а, къамелаш а дӀахьо кхузаманан йукъараллехь кегийрхойн йукъараллехь йолу меттиг, тӀаьхьенашна йукъахь хаддаза йолу мехаллех а лаьцна.