Вахитов, Руслан Мовладан воӀ

Йуккъера ишкол чекхйаьккхина цо 1978-чу шарахь. 1979-чу шеран апрелера 1981-чу шеран июнь бутт кхаччалц Советийн эскарехь гӀуллакх дина цо. 1979—1982 шерашкахь (эскарехь гӀуллакх дарна йукъараваьлла) болх бира Н. А. Анисимовн цӀарахчу Соьлжа-ГӀаларчу мехкадаьттан заводехь, цул тӀаьхьа жимма хан йаьккхира Кхазакхстанан ССР-хь кибирчигаш йуттуш болх беш, цул тӀаьхьа Кхазакхстанехь а, Нохчийчохь а говзанчийн даржашкахь предприятешкахь болх бира. 1991 шарахь дуьйна Кхазакхийн ССР-н «Урал» кооперативан председатель, 1993 шарахь дуьйна Нохчийн Республикан Ичкерин Министрийн Кабинетехь йолчу «Урал» компанин президент.

1993 шо кхачале, НРИ дахар ира телхина хилар бахьана долуш, оппозици кхоллайала йолийра Дудаевн Ӏедална. 1993-чу шеран январь баттахь Вахита а, цуьнан накъосташа а Ӏалхан-Йуьртан ханна йолу кхеташо кхоьллира. Ханна йолу кхеташоно а, Ӏалхан-Йуьртан бахархоша а, Р.М. Вахитовн кхайкхамца жигара дакъалецира Соьлжа-гӀалин театран майданахь белхалойн а, массо а Нохчийн Республикин бахархойн а Дудаевна дуьхьал хӀоттийначу митингехь.

Цхьаболчу талламхошна го оцу хенара Дудаевна оппозици дуьхьала латтаран политикин хилла ца Ӏаш, амма динан дуьхьала латтар:

Пачхьалкхан лакхарчу Ӏедалан векал хилла волу Президент [Дудаев] а, цуьнан чоьхьара го а Къадарийн тӀарикъатан векалш бара. Театран майданахь а, В.И.Ленинан майданахь а дӀахьочу митингашкахь дакъалоцуш йолчу президентана дуьхьал йолчу коалицина йукъахь дукхахберш бу Накъшбандийн тӀарикъатан интеллигенци а, динан дай а бара.^[1]

1993 шеран 14-15 майн буса Вахитовс кхайкхина Ӏалхана-Йуьртхойн Соьлжа-ГӀалара Театран майданара митинган декъахошна тӀелетира дудаевгӀар.

Дуьххьара нохчийн тӀом болучу хенахь 1994-1996 шерашкахь хӀоттийра Ӏалхан-Йуьртан администрацин куьйгалхо, йуьртан бахархойн гуламан дехарца. Декхарш кхочушдина 1995 шеран январера 1996 шеран ноябрь кхаччалц.

НРИ тӀемалошца Хаси-Эвлан барт бинчул тӀаьхьа, цунна репресси ца йира, амма, бахархошна йукъахь иза гӀараваьлла велахь а, 1997 шарахь иза дӀаваьккхира политикин процессера (НРИ парламенте харжамаш) йозуш йоцучу пачхьалкхан дуьхьала волун дела.

1999-чу шеран августехь ШолгӀа нохчийн тӀом болабелира, 1999-чу шеран ноябрь баттахь йуха а Ӏалхан-Йуьртан администрацин коьрте хӀоьттира Вахитов Руслан. Оццу баттахь йуьртана гонаха федералан ницкъашна а, тӀемалошна а йукъахь луьра тасадаларш дӀадоладелира, йуьртачу йаккхий тоьпаш йеттара, тӀемалоша цу чохь позицеш дӀалаьцна, федералан эскарша гуо бира, тӀеман хенахь тӀехдовларш хилира. Вахитовс, гражданийн администрацин куьйгалхо хиларе терра, шен ницкъ ма-кхоччу и баланаш берзош, тӀемалой арабаьхначул тӀаьхьа маьрша дахар дӀахӀотторехь сацам боллуш гӀулчаш йаьхна.

Вийна НРИ тӀемалоша 2000-чу шеран сентярь беттан 16-чу буса шен кертахь. 2000-чу шеран августехь «Коммерсант» газето, тӀемалойн машанийн «Кавказ» сайта тӀехь бинчу хаамна тӀе а тевжаш, хаам бира, Ӏалхан-Йуьртан администрацин куьйгалхо Вахитов Руслан вер дина «лакхарчу тӀемлойн шарӀан кхелан омрица».

• Российн Федерацин Турпалхо (2009 шо 24 март, № 943 мидал, веллачул тӀаьхьа) — гӀуллакхан декхарш кхочуш деш гайтина доьналла а, тупалалла а бахьанехь^[2].

Пхиъ ваша ву, цхьаъ йиша а йу цуьнан: Гилани, Русланбек, Асланбек, Рамзан, Ӏайшат.

• Ӏалхан-Йуртан № 1 йолу йуккъера ишколо лелайо Вахитовн цӀе.
• Ӏалхан-Йуртан Центран урамо а иштта Вахитов Русланан цӀе лелайо^[3].