Абдулаев, Айдамир Сайд-Ахмадович
Айдамир Сайд-Ахьмадан кӀант Абдулаев (Соьлжа-ГӀала) — Нидерландашкахь вехаш волу нохчийн классикин кепара латархо ву, Россин а, Голландин а спортан функционер а, дуьненайукъара категорин судья а ву[1]. Иза ву олимпийн ловзаршкахь судья хилла дуьххьарлера нохчи. 2026-чу шеран хьолехь иза Голландин олимпийн латаран Федерацин вице-президент а, оцу Федерацин Кхелахойн комиссин председатель а ву.
Биографи
Греко-римски латар Ӏамо волавелла Соьлжа-ГӀалахь «Динамо» спортклубехь, шен де — хьакъволу тренеран Абдулаев Сайд-Ахьмадан куьйгаллехь. 2004-чу шарахь Нидерландашкахь шен тренировкаш йуха а йолийра цо. 2005—2007 шерашкахь Голландин чемпион хилла, 2005-чу шарахь Бельгин аьчкка чемпионатан детийн совгӀатхо хилла. Иштта иза дзюдо йукъахь Голландин чемпион ву а, боьра доьхка долуш а ву.
Тренерски белхаш а дӀахьо цо: 2004—2005 шерашкахь «Пехлеван» (Амстердам) спортклубан коьртачу тренеран гӀоьнча хилла, 2005—2006 шерашкахь — Соьлжа-ГӀалин «Динамо» клубан коьртачу тренеран гӀоьнча. 2006-чу шарахь Нидерландашкахь «Маршалл» спортклуб кхолларехь дакъалаьцна.
2007-чу шарахь Голландин вольной а, греко-римски а латаран гулйина командийн куьйгалхо хилла. 2008-чу шарахь дуьйна Голландин олимпийн латаран Федерацин вице-президент ву.
2006-чу шарахь спортан арбитра квалификаци йелла цунна. 2009-чу шарахь дуьйна — дуьненайукъара категорин судя ву. 2010-чу шарахь Сингапурехь хиллачу I-чу Кегирхойн Олимпийн ловзаршкахь судялла дина. 2011-чу шарахь цунна лакхара (олимпийн) категори йелла, цо дакъалаьцна 2012-чу шеран Лондонера Олимпийн ловзаршкахь. ТӀаьхьарчу шерашкахь цо судялла дина Европин а, дуьненан а чемпионаташкахь, царна йукъахь 2019-чу шеран Минскера Европин ловзарш а[2], 2021-чу шеран Харьковера панкратионан дуьненан чемпионат (коьрта судя волуш) а йу[3].
Кхиамаш
- Греко-римски латарехь Голландин чемпион (2005, 2006, 2007);
- Бельгин чемпионатан детийн совгӀатхо (2005);
- Дзюдо йукъахь Голландин чемпион;
- Олимпийн категорин судья (2011).
Билгалдахарш
- ↑ Мовлади Абдулаев. Айдамир Абдулаев. Энциклопедия чеченского спорта (2009 шеран 9 апрель). ТӀекхочу дата: 2026 шеран 5 февраль.
- ↑ Мовлади Абдулаев. Айдамир Абдулаев на II Европейских Играх 2019 в Минске. Энциклопедия чеченского спорта (2019 шеран 13 октябрь). ТӀекхочу дата: 2026 шеран 5 февраль.
- ↑ Мовлади Абдулаев. Айдамир Абдулаев — главный на чемпионате мира. Энциклопедия чеченского спорта (2021 шеран 24 ноябрь). ТӀекхочу дата: 2026 шеран 5 февраль.
Литература
- С-А. М. Аслаханов, Х. Х. Хизриев. Физическая культура и спорт Чечни: истоки и современность. — Москва: «Перо», 2015. — С. 67-68. — 240 с. — ISBN 978-500086-997-0.
Хьажоргаш
- Мовлади Абдулаев. Айдамир Абдулаев. Энциклопедия чеченского спорта (2009 шеран 9 апрель). ТӀекхочу дата: 2015 шеран 20 февраль.