Ибрагимов, Кюра Хьамзатан кӀант

Дуьненчу ваьлла нохчийн халкъ махках даьккхинчу хенахь, 1956-чу шеран оханан беттан 22-чу дийнахь Казахски ССР-н Чиили станцехь. 1973-чу шарахь Соьлжа-ГӀалин школа чекхйаьккхина. 1978-чу шарахь «Ӏилманча-агроном» говзалла карайерзош, тӀехдика чекхйаьккхина ГӀебартойн-Балкхарийн пачхьалкхан университет(оьр.)нохч.. 1981-чу шарахь оццу университетехь аспирантура чекхйаьккхина.

Аспирантура чекхйаьккхинчул тӀаьхьа, «Пригородный» совхозехь коьртачу агрономан болх бина. 1984-1987-чуй шерашкахь Нохч-ГӀалгӀайн хасстоьмаш а, стоьмаш а лелоран Ӏилманан-талламан станцин Ӏилманан лакхара белхахо лелла. Цул тӀаьхьа, 1994-чу шарахь Нохчийн пачхьалкхан хьехархойн институтан хьехархо хилла иза. 1994-1995-чуй шерашкахь К.А. Тимирязевн цӀарахчу Москван йуьртан бахаман академин докторант хилла. 1995-чу шарахь докторан диссертаци чӀагӀйина.

Дехьаваьлла Нохчийн йуьртан бахаман Ӏилманан-талламан институте, цигахь, 2009-гӀа шо кхаччалц директоран даржехь болх бина. 2009-чу шарахь дуьйна Нохчийн пахьалкхан университетан хьехархо а, Нохчийн Республикин Ӏилманийн академин Ӏилманан коьрта белхахо а ву.

70 сов Ӏилманан белхан а, 3 монографин а автор.

Зуда йалийна ву. Кхаа беран да ву.

• Да Ибрагимов, Хьамзат ИсмаӀалан воӀ – химин Ӏилманийн доктор, профессор, РАЕН-н академик, Нохчийн Республикин Ӏилманан академи кхоьллинчарех цхьаъ, цуьнан хьалхара Президент, Россин Ӏилманийн академин Ӏилманан-талламан комплексни институтан директор, СССР-н Лаккхарчу Кхеташонан ворхӀолгӀачу гуламан депутат, йукъараллин гӀуллакххо;

• Ваша Ибрагимов, Канта Хамзатович – йаздархо а, йукъараллин гӀуллакххо а, Россин Федерацин пачхьалкхан премин литературин а, искусствон а декъан лауреат, Нохчийн Республикин йаздархойн союзан председатель, Нохчийн Республикин халкъан йаздархо, Нохчийн Республикин Ӏилманийн академин академик, экономикин Ӏилманийн доктор, профессор, Россин йаздархойн союзан декъашхо;

• Йиша Паскачёва, Хьамзатан йоӀ Байза – химин Ӏилманийн кандидат.

• Ибрагимов К. Х. Административно-правовой режим земель сельскохозяйственного назначения. — Академия Наук Чеченской Республики, 2011. — 735 с. — ISBN 5431400142.
• Ибрагимов К. Х. Земля и люди Чечни: история и современность. — 2013. — 400 с.
• Ибрагимов К. Х. История права собственности на землю в России: IX - начало XX века. — Республиканский полиграфкомбинат, 2008. — 354 с. — ISBN 5881958993.
• Ибрагимов К. Х., Ибрагимов А. К. Петр Великий и Правительствующий Сенат. — ЮНИТИ, 2010. — 319 с. — ISBN 5238018878.