Даудова, Асет Мовлин йоӀ

Даудова Асет йина 1981 шарахь Нохчийчоьнан Курчалойн кӀоштера Гелдагана йуьртахь. Меттигерчу школехь дешна цо; цигахь вевзира цунна шен хинволу майра, Нохчийн Республикин Правительствон хинволу председатель Даудов Мохьмад. Церан той хилла 2001 шарахь.

ДаудовгӀеран доьзалехь кхиош ду 12 бер — 6 кӀант а, 6 йоӀ а^[2][3].

2023 шеран гурахь Российн Федерацин президенто В. В. Путинас Даудована «Нана-турпалхо» сийлахь цӀе йелира иштта дешнашца: «Доьзалан институт чӀагӀйарехь а, бераш кхиорехь а баккхий кхиамаш бахарна». Итт йа цул сов бер кхиош болчу Российн зударшна «Нана-турпалхо» цӀе йукъайаьккхира президенто 2022 шеран аьхка, цуьнца догӀучу указана куьг а йаздеш. СовгӀат ду дашо седа, бриллианташ а, сир диллина мехкан хӀост а йолуш; иза 1 миллион сом ахчан совгӀатца йохуш йу. Иштта цӀе Советан союзехь 47 шарахь лаьттина, 430 000 сов зудчунна йелла иза.

Даудова Асетна и совгӀат делира Нохчийчоьнан куьйгалхочо Кадыров Рамзана: «Вайна Асет йевза оьзда, тидаме, догцӀена, дог лозуш йиша а, нус а санна, кхолламан массо а зераш, беза-бевзарш балар, кхин а дуккха а халонаш шен гӀийлачу белшаш тӀехь лан ницкъ кхаьчна. Оха чӀогӀа лоруш йу иза, цуьнан доьналла хиларна, Делах кхоьруш хиларна, шен бераш сийлахь кхиорна»^[4].

Даудова Асет Нохчийн Республикехь и цӀе йелла шолгӀа зуда хилла дӀахӀоьттина. Хьалхо, 2022 шеран 14 ноябрехь, «Нана-турпалхо» орден йелла Кадырова Медни Мусан йоӀан.