Гикало, Николай Фёдорович

ГӀуллакххочун доьзалехь дуьненчу ваьлла. Украинхойн къомах ву. Чекхйаьккхина Тифлисан тӀеман-фельдшерски ишкола (1915). Дуьненан хьалхарчу тӀеман дакъалацархо, фельдшер, Георгиевски жаӀарца совгӀат дина ву.

1917-чу шарахь дуьйна РСДРП(б)-н декъашхо.

1918-1927-чуй шерашкахь Кавказехь партин балхахь хилла.

• 1918-гӀа шо — РКП(б)-н Соьлжа-ГӀалин комитетан председатель. Соьлжа-ГӀалин Советан кхочушдаран комитетан председатель, Соьлжа-ГӀалахь долчу советски герзашца болчу ницкъийн буьйранча, оцу шеран хьаьттан-лахьанан беттанашкахь кӀайчу гӀалагӀазкхийн тӀелатарх Соьлжа-ГӀалин дуьхьалонна куьйгалла деш вара, и бахьана долуш, Революцин ТӀеман Советан омрица РСФСР-н ЦӀечу Байракхан орденца совгӀат дина,
• 1919-гӀа шо — РКП(б)-н Кавказан мехкан комитетан декъашхо,
• 1919-1920-гӀий шераш — Теркан областехь а, Дагестанехь а гӀаттамхойн эскаран буьйранча,
• 1920-гӀа шо — Теркан областан а, Дагестанан а тӀеман комиссар,
• 1920-1921-гӀий шераш — Персидски цӀечу эскаран буьйранча,
• 1921-гӀа шо — РКП(б)-н Ламанан областан комитетан жоьпаллин секретарь,
• 1921-1925-гӀий шераш — РКП(б)-н ЦК-н Къилба-Малхбален бюрон декъашхо
• 1924-1925-гӀий шераш — РКП(б)-н Къилбаседа-Кавказан мехкан комитетан агитационни-пропагандин декъан куьйгалхо,
• 1925-1926-гӀий шераш — РКП(б)-н Къилбаседа-Кавказан мехкан комитетан секретарь,
• 1926-1927-гӀий шераш — РКП(б)-н Къилбаседа-Кавказан мехкан комитетан шолгӀа секретарь.

1927-1928-гӀий шераш — РКП(б)-н ЦК-н Йуккъерчу азиатски бюрон вовшахтохараллин декъан куьйгалхо а, оцу бюрон декъашхо а. 1929-чу шарахь — Узбекски ССР-н КП(б)-н ЦК-н хьалхара секретарь, 1929-1930-чуй шерашкахь — Азербайджански ССР-н КП(б)-н ЦК-н хьалхара секретарь.

1930-1931-чуй шерашкахь — КП(б)-н ЦК-н вовшахтохараллин-инструкторски декъан куьйгалхочун заместитель. 1931-1932-чуй шерашкахь — ВКП(б)-н Москван областан а, гӀалин а комитетийн секретарь, ВКП(б)-н Москван комитетан вовшахтохараллин декъан куьйгалхо.

1932-1937-чуй шерашкахь — Белоруссин КП(б)-н ЦК-н хьалхара секретарь. Партийн организацеш дӀацӀанйар дӀадаьхьна, оцу муьрехь Белоруссин КП(б)-н декъашхойн барам шозза гергга лахбелла. Республикин йуьртан бахамехь индустриализаци а, коллективизаци а йар дӀадаьхьна.

1937-чу шарахь дуьйна Украинин КП(б)-н Харьковски обкоман а, горкоман а хьалхара секретарь. И мур билгалбаьккхина бу СССР-н НКВД-н 1937-чу шеран мангалан беттан 30-чу дийнахьлерчу № 00447 йолчу омрица кхоьллинчу къаьстинчу «кхаана» йукъа вахийтарца а^[1], сталински таӀзаршкахь дакъалацарца а^[2].

ВКП(б)-н ЦК-н декъашхочун дарже кандидат (1934—1937). ВКП(б)-н ревизин йуккъерчу комиссин декъашхо (1930—1934). Украинин КП(б)-н ЦК-н политбюрон декъашхо (1937—1938).

Схьалаьцна 1937-чу шеран эсаран беттан 11-чу дийнахь. 1938-чу шеран оханан беттан 25-чу дийнахь СССР-н Лакхарчу Суьдан ТӀеман Коллегис уггаре а лакхара таӀзар дан кхел кхайкхина, оццу дийнахь тоьпаш а тоьхна цунна.

1955-чу шеран товбецан 2-чу дийнахь кхелхина а волуш, КПСС-н ЦК-хь йолчу КПК-с партин къепеца йухаметтахӀоттийна.

СовгӀат дина Ленинан орденца а, ЦӀечу Байракхан орденца.

ХӀусамнана — Евгенийн йоӀ Чижова Наталья (1897—1968), «халкъан мостагӀчун хӀусамнана санна» чуйоьллина, 1955-чу шарахь паргӀатйаьккхина^[3].

• Соьлжа-ГӀалахь Халкъийн ДоттагӀаллин майданахь хӀоттийна Гикало Николайна а, Шерипов Асланбекана а, Ахриев ГӀапурана а хӀоллам бу.
• Н. В. Гикалон сийнна Нохчийчоьнан Грозненски кӀоштахь цхьаьна эвлана цӀе а тиллина (2020-чу шарахь дуьйна Соьлжа-ГӀалин гӀали йукъайогӀу микрорайон).
• Гикалон цӀарах урамаш долу гӀаланаш: Буру-ГӀала, Соьлжа-ГӀала, Ростов-на-Дону, Нальчик, Минск.