Хлебников, Валерий Владимирович

Хлебников Валерийс 1969-чу шарахь чекхъйаьккхира Столярский Пётран цӀарах йолу Одессера леррина мукъаман школа, кхидӀа а дешар Ленинградехь дӀадахьа сацам бира цо. 1974 шарахь Хлебниковс чекхъйаьккхира Ленинградера консерватори Паршин Александран классехь, ткъа 1983 шарахь чекхъйаьккхира аспирантура Ленинградера консерваторехь Никончук Кириллан куьйгаллица.

1974—2001 шерашкахь Хлебников Ростовн филармонин симфонин оркестран солист вара. 1986-чу шарахь цунна йелира РСФСР-н хьакъволу артист цӀе. 1986—2005 шерашкахь цо куьйгалла дира «Камерата» хьалхарчу а, хӀинцалера а мукъаман ансамблан.

1996 шарахь Хлебников Валерийс чекхъйаьккхира С. В. Рахманиновн цӀарах йолу Ростовра пачхьалкхан консерватори профессора Мартынов Равилан операн а, симфонин а дирижёран классехь. 2002 шарахь дуьйна Хлебников Къилбаседа ХӀирийчоьнан-Аланин Къоман симфонин оркестран исбаьхьаллин куьйгалхо а, коьрта дирижёр а ву, иштта дуккха а кхечу оркестрашца цхьаьна болх беш ву.

1977-чу шарахь Ростоверчу мукъаман-хьехархойн институтехь хьеха волавелира иза. Карарчу хенахь Хлебников Валерий Ростовера консерваторехь гобойн а, симфонин а дирижёран классехь профессор вара. Хлебниковн дуккхаъчу белхан накъосташна хетарехь, Россин тоьллачу гобойн хьехархойх цхьаъ ву иза. Цуьнан дешархошна йукъахь бу Т. Малиарова а, А. Абашкин а санна болу къона музыканташ.

2011 шарахь дуьйна дуккха а шераш даьлча йухакхоьллинчу Шахбулатов Ӏаднан цӀарахчу Нохчийн пачхьалкхан филармонин симфонин оркестран а, иштта 2015 шарахь Соьлжа-гӀалахь кхоьллинчу берийн симфонин оркестран а исбаьхьаллин куьйгалхо а, коьрта дирижёр а ву. ДегӀастан къоман симфонин оркестран коьрта дирижёр.

Хлебников Валерийс шен 65 шо кхачар даздира 2016-чу шарахь 16-чу майхь Соьлжа-ГӀаларчу театран а, концертийн а залан сцени тӀехь.

«ДегӀастанан Республикана хьалха дина гӀуллакхашна» орден йелла (2021 шо)^[2].

2021-чу шарахь цунна йелла «Нохчийн Республикина хьалха дина гӀуллакхашна» мидал^[3].