Левшин, Александр Иванан кӀант

Левшин Александр дуьненчу ваьлла 1932-чу шеран эсаран беттан 10-чу дийнахь Нохч-ГӀалгӀайн АССР-н Старые Промысла эвлахь (ХӀинца Соьлжа-ГӀали йукъахь)^[1]. 1947-чу шарахь деша вахана Соьлжа-ГӀаларчу корматаллин училище, дешна ваьлча Малгобеке дӀавахана. Болх бина «Грознефть» цхьаьнакхетараллехь гӀоьнан белхало а, бурутохархочун гӀоьнча а, бурутохархо а волуш, цул тӀаьхьа балхана йукъара а ца волуш, кхаа шарахь бурутохаран говзанчийн ишкола чекхйаьккхина^[1].

Левшина болх бечу хенахь цуьнан бригадин аьтто баьлла кӀорггехь долу мехкадаьттан бураш сиха карадарехь. 1965-чу шарахь бригадех тешийна Малгобекерчу Теркан дукъа тӀехь кӀорггера ӀаӀарш лохуш хьалхара бурутохар; 3750 метр кӀорга буру тоьхна бригадо, и бахьана долуш кӀоргге бухахь мехкадаьтта а карийна^[1].

1966-1987-чуй шерашкахь «Сахалингеология» цхьаьнакхетараллин Сахалински мехкадаьтта а, газ а лахаран экспедицехь бурутохаран говзанча а волуш болх бина, дакъалаьцна Малхбален-Пуговски газан а, Погранични мехкадаьттан а маьӀданаш долу меттигаш схьайелларехь а, фонтанаш дӀадахарехь^[1]. 1987-чу шарахь дуьйна союзан маьӀна долу леррина пенсионер хилла^[1]. Пенсе вахарца Дона-тӀера-Ростов дӀавахана. Жигара дакъалаьцна йукъараллин гӀуллакхашкахь, Ростов гӀалин ветеранийн Советехь йолчу Социалистически Къинхьегаман Турпалхойн Советехь куьйгалла деш хилла. Велла 2006-чу шеран бекарг беттан 18-чу дийнахь, дӀавоьллина Дона-тӀера-Ростоверчу Къилбаседа кешнашкахь.

• СССР-н Лаккхарчу Советан Президиуман 1965-чу шеран гӀуран беттан 24-чу дийнахьлерчу Указца Левшин Александрана Ленинан орден (№ 343369) а луш, Социалистически Къинхьегаман Турпалхочун лакхара цӀе а, «Марс а, варзап а» мидал (№ 8999) а йелла;
• Иштта, цхьамогӀа мидалшца совгӀаташ а дина;
• Нохч-ГӀалгӀайн АССР-н Лаккхарчу Советан Президиуман Сийлаллин грамоташ (1965)^[1].

• А. И. Левшинан дахарх а, къинхьегаман гӀуллакхах а лаьцна материалаш а, суьрташ а ГӀалгӀайчохь йолчу Малгобекски музейн фондашкахь Ӏалашйеш йу^[1].