Кишиев Кунта-Хьаьжа

Кишиев Кунта-Хьаьжа — вайнаха чӀогӀа лоруш, вайн дозанал арахьа дехачу кьаьмнашна а вевзаш воккха Эвлия, Шайх, Устаз ву. Кунта-Хьажа вина 1812-чу шеран 11-чу июлехь Иласхан-Йуьртахь. Нохчийн Муфтис Межиев Салахьа-Хьажас дуьйцу: «Кунта-Хьажин дай Кьурайшин цӀийнах, Турпал-Ӏелин тӀаьхьенах болуш хилла. Шемара Абаз баьхкина, Абазара ГӀирма баьхкина, ГӀирмара ГӀумха баьхкина, ГӀумхара ГӀоьрдала баьхкина, ГӀоьрдалара Мелчу-хе баьхкина, Мелчхера Иласхан-Йуьрта баьхкина, цигахь Хьаьжа дуьненчу ваьлла» — бохуш. Цхьаболчу наха олуш долу: «Шемара Абаз баьхкина — Абзой хилла», иза таллам бан безаш ду.