Исраилова, Сацита Магомедан йоӀ
Саци́та Магоме́дан йоӀ Исраи́лова (оьрс. Исраилова, Сацита Магомедовна; Соьлжа-ГӀала) — Нохчийн Республикан Халкъан библиотекан директор а, Нохчийн Республикин суртдиллархойн бертан декъашхо а, Нохчийн Республикин йукъараллин палатан декъашхо а, Нохчийн Республикин оьздангаллин Сийлахь гӀуллакххо а, Соьлжа-ГӀалин Сийлахь гражданин[1].
Биографи
Соьлжа-ГӀалахь йина. 1983-чу шарахь чекхйаьккхира йуккъера ишкол. Дешна йаьллачул тӀаьхьа, 12-чу лоьмар йолу библиотеке берийн декъан библиотекар дарже балха йеара. 1984-чу шарахь талларан декъан коьрта библиотекар хилира.
1990-чу шарахь Краснодаран пачхьалкхан культурин институт чекхйаьккхира заочно. Оццу шарахь гӀалин йуккъера библиотекин хьаькхо талларан декъан куьйгалхо хилира, ткъа 1992-чу шарахь — Соьлжа-ГӀалин Централизованни библиотечни системан директор.
1990-чу шерийн чакхенехь оцу хенан Ӏедало библиотека бизнесменашка дӀайелира. 2000-чу шарахь, гӀалахь тӀеман гӀуллакхаш дуьйна дӀахоьдучу хенахь, Исраиловас маьрша а, цул тӀаьхьа шен лаамца гӀоьнчашца а цхьаьна, ахйохийна йолу гӀишло цӀанйира, торира, керла жайнаш гулдира. Цул тӀаьхьа цунна дуккха а ницкъ билла бийзира кафен метта библиотека схьайаккха. Иштта, ГӀалин йуккъера библиотека йохийначу гӀалахь болх беш йолу хьалхара оьздангаллин учреждени хилира, дуккха а хенахь иштта цхьаъ бен йоцу учреждени йара иза[2].
Цо зорбане арахийцира Соьлжа-ГӀалин библиотекин система кхиорех лаьцна а, тӀаьхьалонан муьрехь оцу системан балхах лаьцна а цхьа могӀа белхаш. Нохчийн исбаьхьаллин историх а, хьолах а лаьцна белхийн автор йу иза, къаьсттина суртдилларан говзаллех лаьцна. Оцу гӀуллакханна 2011-чу шарахь Нохчийн Республикин Суртдиллархойн союзе йиллира иза. 2006-чу шарахь цуьнан «Миссия возрождения» («МеттахӀотторан мисси») йаззам «Библиотека» журналан 9-чу лоьмарехь зорба тухуш хилира, ткъа цуьнан сурт оцу журналан тӀехьарчу агӀонна тӀехь дара.
2000-чу шарахь дуйна «Яблоко» партин декъашхо йу, 2002–2008 шерашкахь — «Яблоко» партин Нохчийн регионан организацин председателан заместитель йара[3].
2014-чу шарахь Нохчийн Республикин Къоман библиотекин директор хилира, оцу даржехь Эдилбек Хасмагомадов хийцира цо.
СовгӀаташ
- 2004 — М. Ю. Лермонтован цӀарах мидал «Кавказехь машар а, барт а меттахӀотторехь шен лаамехь дакъалацарна»;
- 2005 — «Нохчийн Республикан Интеллектуальни центр» региональни йукъараллин организацис йелла диплом «Хьекъалан белхан декъехь шен болх дӀабахьарна»;
- 2008 — «НР оьздангаллин Сийлахь белхало»;
- 2014 — Сийлахь билгало «Къинхьегаман къастамна»;
- 2014 — Соьлжа-ГӀалин Сийлахь гражданин;
- Нохчийн Республикан оьздангаллин министерствон а, Соьлжа-ГӀалин мэрин а, культуран департаментан а грамоташ[4][5];
- Нохчийн Республикин Правительствон «Сийлахь грамота» (2022)[6].
Билгалдахарш
- ↑ Об утверждении членов Общественной палаты Чеченской Республики от 2 апреля 2014. www.docs.cntd.ru. ТӀекхочу дата: 2026 шеран 4 июнь.
- ↑ Вечерний Грозный. v-grozny.narod.ru. ТӀекхочу дата: 2026 шеран 4 июнь.
- ↑ Павлов, Сергей Общее чувство - страх. www.yabloko.ru. ТӀекхочу дата: 2026 шеран 4 июнь.
- ↑ Хранитель мудрости... www.grozny-inform.ru. ТӀекхочу дата: 2026 шеран 4 июнь.
- ↑ В Грозном отметили 110-летие Национальной библиотеки. ЧГТРК Грозный (2014 шеран 12 декабрь). ТӀекхочу дата: 2026 шеран 4 июнь.
- ↑ Распоряжение. www.chechnya.gov.ru (2022 шеран 29 ноябрь). ТӀекхочу дата: 2026 шеран 28 август.