Яндарбиев, Зелимхан Абдулмуслимович
Яндарбиев Зелимхан Абдулмуслиман воӀ (1952 шеран 12 сентябрь, Выдриха, Кхазакхийн Советийн Социалистийн Республика, ССРС — 2004 шеран 13 февраль, Доха) — нохчийн политикин гӀуллакххо, йаздархо. 1996-чу шарахь Нохчийн Пачхьалкх Ичкерин куьйгалхо волу Джохар Дудаев дӀакхелхинчул тӀаьхьа, Ичкерин Низамца Яндарбиев Зелимхан пачхьалкхан куьйгалле веара (1996-чу шеран 21-чу апрелера 1997-чу шеран 12-чу феврале кхаччалц).
Биографи
Зелимхан Яндарбиев Кхазакхстанехь вина ву. Тайпан Хьала-Кело ву. Нохчийн къам Сибрехара Даймахка йухадоьрзучу муьрехь, Зелимхан валош цуьнан доьзал цӀа беара, шайн дай баьхначу Йоккхачу АтагӀа.
17 шо кхаьчначу хенахь, кибарчиг йуттуш, жагӀа кхоьхьуш балха хоьттира. 1972-чу шарахь эскаре кхайкхира. Оццу хенахь, филологан (нохчийн мотт, литература) факультете Нохч-ГӀалгӀайн пачхьалкхан университете деша хоьттина, 1981-чу шарахь дешна велира.
Университет йеккхинчул тӀаьхьа Нохч-ГӀалгӀайн зорбан цӀийн куьйгалхочун балха вахара. 1985–1986 шерашкахь ССРС йаздархойн бертан йукъайогӀуш йолу исбаьхьаллин литература нахалйаккхаран комитетан куьйгалхо хӀоттийра Зелимхан.
Хийцамийн зама тӀейеъча, политикин жигара болх болийра Зелимхана, «Барт» олучу цхьанакхетараллин куьйгаллехь. Цул тӀаьхьа Нохчийчохь кхоллайелира «Вайнехан демократин цхьанакхетаралла», цуьнан куьйгалле веара Зелимхан. Нохчийн исторехь и цхьанакхетаралла даккхийчу элпашца меттиг дӀалоцуш йу, хӀунда аьлча, маршонехьа болийначу боламан коьртехь бара оцу цхьанакхетараллин декъашхой.
Зуда йалийна вара, 5 беран да вара Зелимхан (3 йоӀ, 2 кӀант). Воккхах волу кӀант вардан бугӀа вахан велира 1980-чу шерашкахь. Жимах волу Дауд лазийра Дохехь, Зелимханана дуьхьал Российн къайлах хьаькхнаша дӀайехьначу операцехь диначу эккхарехь.