Тахаев, Магомед Саидбекович
Магоме́д Саидбе́кан воӀ Таха́ев (1960, Соьлжа-ГӀала) — «Ловзар» цӀе йолу хелхаран ансамбль кхоьллинарг а, куьйгалхо а, Нохчийн Республикин Сийлахь исбаьхьаллин гӀуллаккхо а[1].
Биографи
Вина Соьлжа-ГӀалахь 1960. КхоалгӀачу классехь доьшуш волуш, республикански пионерийн дворецехь хелхавала волавелира иза. Соьлжа-ГӀалара оьздангаллин-кхетош-кхиоран училище чекхйаьккхина цо. Иза чекхйаьккхинчул тӀаьхьа цо болх бира тайп-тайпанчу исбаьхьаллин тобанашкахь, шайна йукъахь «Вайнах» ансамблехь а йолуш. 1983 шарахь цо кхоьллира къоман хелхаран шен тоба — «Ловзар» ансамбль.
Ансамблан болх сацийра 1994-чу шеран гурахь Нохчийчохь тӀеман гӀуллакхаш бахьана долуш. ГӀуллакхаш юха а дӀадоладелира 1995-чу шеран асаран баттахь, бераш Нальчике эвакуаци йира.
1995-1999 шерашкахь Тахаев Магомед Нохчийн пачхьалкхан филармонин директоран даржехь вара[2].
1998-чу шарахь ансамблана Пачхьалкхан берийн ансамблан статус йелира, къоман культура йовзийтарехь а, кхиорехь а цо дӀалаьцна дакъа билгал а доккхуш[3].
Дукха хенахь дуьйна ансамблан йа спектаклан костюмаш а, йа гуттаренна а репетици йан меттиг а йацара. Нохчийн Республикин Пачхьалкхан Кхеташонан Председатела Сайдуллаев Малика бераш шен маӀа кӀел а эцна, ансамблна хьалха лаьтташ долу гӀуллакхаш дӀадерзийра.
2001 шеран кхолламан беттахь ансамбло керла программа йовзийтира Москвахь дӀайаьхьначу дуьненайукъара фестивалехь. Цул тӀаьхьа тобане кхайкхамаш кхаьчна Россехь а, дозанал арахьа а дӀахьочу фестивалашкахь дакъалаца.
2003 шеран апрелехь ансамбло гайтира Парижера Пьер Карденан театрехь[4], цул тӀаьхьа концерташ елира Страсбургехь а, Каннашкахь а, Баден-Баденехь а (Германи). 2005 шеран кхолламан беттахь «Ловзар» кхайкхира дуьненайукъара проектехь дакъалаца — мюзикл «To Be A Star» (Катар) Дохехь — АЦШ а, Китайн а, Японин а, Къилбаседа Африкера а, масех Европан пачхьалкхийн а тобанашца цхьаьна[5].
ТӀетохаран дешаран муниципальни бюджетни хьукуматехь «Ленински кӀоштан берийн кхоллараллин центр Соьлжа-ГӀалахь» цӀе йолчу тӀетохаран дешаран хьехархочун болх беш ву[6].
Ансамблан кхиамаш
Тахаев Магомедан куьйгаллица «Ловзар» ансамбло толам баьккхира дуккха а дуьненайукъарчу конкурсашкахь:
- 1996 — Варнехь (Болгари) дуьненайукъара фестивалехь совгӀат дина;
- 1997 — Туркойчохь хиллачу дуьненайукъара фестивалехь дипломант (Чорум, Турхал);
- 1998 — Туркойчоьнан Республикан 75 шо кхачарна лерина дуьненайукъара фестивалехь лауреат;
- 2000 — 5-гӀа Дуьненайукъара «Ярославлан даздарш» фестивалехь лауреат «Ярославские гуляния»;
- 2001 — Лондонехь Royal Festival Hall спектакль гайтира; Ярославлехь дӀайаьхьначу «Культура машаран дуьхьа» дуьненаюкъарчу фестивалехь Гран-при;
- 2003 — Кремлан цӀийнехь «Кавказан халкъийн хелхарш» программин презентаци; Малхбузе Европехь тур (Париж а, Страсбург а, Каннаш а, Баден-Баден а);
- 2014 — Польшин «Mam talent!» телегойтийлехь дакъалаьцна (финалист)[7].
СовгӀаташ
Доьзал
Зуда — Тамила Тахаева. ЙоӀ — Хьава[5].
Билгалдахарш
- ↑ Чечня. Заслуженный деятель искусств Магомед Тахаев, ИА Чеченинфо. Дата обращения: 21 июлехь 2026.
- ↑ 1 2 Прошлое и настоящее первой и единственной Чеченской филармонии. Вести Чеченской Республики © (2024 шеран 19 август). ТӀекхочу дата: 2026 шеран 21 июль.
- ↑ Заслуженный деятель искусств Магомед Тахаев, ИА Чеченинфо. Дата обращения: 21 июлехь 2026.
- ↑ Парижане рукоплескали «Ловзару». www.trud.ru (2003 шеран 19 апрель). ТӀекхочу дата: 2026 шеран 21 июль.
- ↑ 1 2 «Ловзар» – это моя семья» (2010 шеран 30 декабрь). ТӀекхочу дата: 2026 шеран 21 июль.
- ↑ 1 2 распоряжение. www.chechnya.gov.ru (2018 шеран 24 декабрь). ТӀекхочу дата: 2026 шеран 21 июль.
- ↑ Ловзар, Строительно-информационный портал. Дата обращения: 21 июлехь 2026.
Хьажоргаш
- Мусаев Зелимхан. «В танце проявляется характер народа!» web.archive.org. Информационное агентство «Грозный-Информ» (2007 шеран 8 декабрь). ТӀекхочу дата: 2026 шеран 21 июль.