Сардалова, Зулай Махмудовна
Сардалова Зулай Махмудовна (1936 шеран 5 май, Соьлжа-ГӀала, Къилбаседа-Кавказан мохк — 2005 шеран 15 ноябрь, Керла Алда) — советан а, россин хелхархо а, «Вайнах» ансамблин солист, Нохч-ГӀалгӀайн АССР Халкъа артист, РСФСР Сийлахь артист йара.
Биографи
Иза йина 1936 шеран 5-гӀа майхь. Цуьна да школан директор хиллера. Иза «халкъан мостагӀ» ву аьлла хӀаллаквинера Ӏедало. Цуьна нана шен кхаа бераца йисира. Нохчий цӀера бохуш Зулай бархӀ шо кхаьчча йара. Кхазакхстанехь Зулай а, цуьна доьзал а цхьана гӀаскхийн хуьсамо тӀелецира.
Вайн дериг а халкъо санна, цера хӀусамо дукха халонаш лайра: нана чӀогӀа цомгуш хилира, къело бахьнехь бераш берий цӀеношка дӀасадекъа дийзира, йуха а шайн гергарнаш лоьхуш цара дукха хан а, ницкъ байира.
1956 шарахь, хӀаллакйина «Вайнах» ансамбль меттахӀоттош хенахь, Кхазакхстанехь кхайкхина бара харжам. Зулайс цигахь дакъа а лецна, «Вайнах» ансамбль йукъа йахара. 20 шарахь йара иза тобанан хьалхара хелхархо.
Иза кхелхина 2005 шеран 15-гӀа ноябрехь.
СовгӀаташ
- Нохч-ГӀалгӀайн АССР Халкъа артист[1];
- ХӀирийчоьнан АССР Сийлахь артист;
- ГӀебартойн-Балкхаройн Сийлахь артист;
- РСФСР Сийлахь артист.
Доьзал
Цуьна цӀийнда вара нохчийн гӀарваьлла артист Шита Эдисултанов. Уьш цхьана 40 шарахь бехира. Цера кӀант висна.
Билгалдахарш
- ↑ Сценическая звезда. www.chechnyatoday.com (2009 шеран 30 ноябрь). ТӀекхочу дата: 2026 шеран 6 август.
Литература
- Юсупов Азим. Зулай Сардалова [народная артистка ЧИАССР] / Д. Музакаев // «Вайнах» — жизнь моя. — Грозный, 2010. — С. 208—212.
- Юсупов Азим. Сардалова Зулай = Солистка ансамбля «Вайнах» Зулай Сардлова [Текст]: [«Вайнах» ансамблан солистка хиллайолчу Зулай Сардаловх лаьцна] / А. Юсупов // Даймохк. — 2007. — 17 окт.