Дош (журнал)
«Дош» (оьрс. Слово) — Российн а, Кавказан а дозуш доцу юкъараллин-политикин журнал. Информацин политика лаьтта Къилбаседа Кавказехь адамийн бакъонаш талхаран проблемана тӀе тидам а бохуьйтуш, хиламаш бийцарх. Иштта журналехь зорбане йоху Къилбаседа Кавказан культурина а, историна а, регионерчу социально-экономикин хьолана а лерина материалаш.
Кхоьллина 2003 шарахь. Иза кхоьллинчу хенахь дуьйна коьрта редактор Шовхалов Исрапил ву, цхьана кхоьллинчарех а, редакторх а ву Дудуев Ӏабдулла.
Журналан болх
Журналан корреспонденташ болх беш бу Дагестанехь а, ГӀалгӀайчохь а, ГӀебарта-Балкхаройчохь а, Кхарачой-Чергазийчохь а, Къилбаседа ХӀирийчохь а, Нохчийчохь а. Журнал даьржина ду Россехь, Азербайджанехь, Эрмалойчохь, Гуьржийчохь, Литвахь, Австрехь, Белгехь, Йоккхачу Британехь, Германехь, Норвегехь, Францехь, Чехехь — нохчийн йоккха диаспора йолчу пачхьалкхашкахь.
Журналан белхахоша дийцарехь, массо а бозуш боцучу зорбанан гӀирсашка негативан агӀор хьоьжу Ӏедалхой. Цундела тайп-тайпана проблемаш нисло белхахошна, тергонехь латтош бу уьш. Журналан цхьайолу лоьмарш, церан чулацам бахьана долуш, дӀасаяржор дихкина меттигаш а нисъелла. 2004 а, 2008 а шерашкахь ГӀалгӀайчоьнан президент хиллачу Аушев Русланан интервью зорбане ялар бахьана долуш, журнал дихкира ГӀалгӀайчохь.
СовгӀаташ
2009-чу шарахь «Доза доцу репортераш» цӀе йолчу дуьненаюкъарчу адамийн бакъонашларъяран организацино зорбанан маршо ларъярехь дакъалацарна «Зорбанан маршо» совгӀат делира журналана. 2006-чу шарахь оцу совгӀатан лауреат хилла оьрсийн «Новая газета».
2010-чу шарахь Истамбулехь книжни ярмарка йоьдуш журналана Дуьненаюкъара зорбанан гӀирсийн ассоциацино делира Дуьненаюкъара зорбанан маршонан совгӀат. Оьрсийн журналисташна юкъахь и совгӀат хьалха луш хилла Политковская Анна бен (еллачул тӀаьхьа)[1]. 2012 шарахь зорбанан гӀирсана делира Малхбален Европехь маьрша зорбанан Герд Буцериусан цӀарах совгӀат[2].
Билгалдахарш
- ↑ Журнал «ДОШ» награждён международной премией «За свободу печати». humanrightshouse.org (2010 шеран 8 ноябрь). ТӀекхочу дата: 2019 шеран 27 апрель. Архивйина 2018 шеран 24 июлехь
- ↑ Журналистам из СНГ вручена немецкая премия «Свободная пресса Восточной Европы» Архиван копи 2021 шеран 20 августехь дуьйна Интернетан архив#Проекташ // Deutsche Welle