Кадимагомедов, Мохьмадхьабиб Зайнудинович

Къоманна — жӀай. Кадимагомедов Мохьмадхьабиб латаре нисвелла, ала тарло, ларамаза. Футбол чӀогӀа езара цунна, йуьртарчу спортишколехь уьш кест-кеста футболах ловзу бохуш накъосташкара хезча, цига воьдура иза. Цигахь цунна бевзира маьрша латаран тренерш, цара тӀедиллира лаьмнашкахь даьржина долу латаран говзалла дӀалаца аьлла. Мохьмадхьабибан хӀетахь ворхӀ шо дара, иза хӀинцале а Ӏаш вара Цумадин кӀоштан йуккъерачу йуьртахь Агвалихь, цигахь цуьнан доьзал Хуштада эвлара дӀабахана бара. Цул тӀаьхьа бутт баьлча, ишколехь латаран къийсадаларшкахь толам баьккхира цо, цул тӀаьхьа кӀоштан чемпионатехь пхоьалгӀа меттиг йаьккхира цо. ХӀетахь къона латархо Ӏамош вара меттигерчу тренершца Магомедов Ахьмадца а, Бадрудинов ИсмаьӀалца а. Церан куьйгаллица цуьнан дуьххьарлера боккха кхиам хилира 2007-чу шарахь, Воронежехь кегийчу нахана йукъахь хиллачу Российн чемпионатехь толамхо хилира. Ала дашна, оцу къийсадаларийн ахфиналехь цо эшийра хинволу дуьненан чемпионатан финалист а, Европин чемпион а Рашидов Хьажмурд.

Оцу кхиамна тӀаьхьа керла толамаш богӀур бу аьлла хетара, амма Магомедхабиба кхин онда жамӀаш ца гайтира йа кегийрхойн а, йа жимахойн а гоьнаш тӀехь. Цхьаъ бен доцург хьахо догӀу 2011-чу шарахь къоман кегийрхойн чемпионатехь цо йаьккхира борзан мидал. Оццу 2011 шарахь Кадимагомедов дӀавахара ХӀинжа-ГӀала, шен хиллачу тренерашца Абдулбасиров Хьасанца а, Амирасланов Муслимаца а цхьаьна Ӏамораш дан волавелира Олимпан резерван № 3 йолу спортан ишколехь. Толамах ца хиларо дог дохадора Мохьмадхьабиба, иза шелвелира тренировкашна, цхьа меттиг йеира цуо латар охьадиллла мегаш. Цуьнан ненан вашас МохьмадсаӀида, 2017-чу шарахь кегийрхойн дуьненан чемпионатехь толам баьккхинчу Ахмедов ӀабдуллахӀан дас, догдохар дӀадаккха гӀо дира цунна. «Ненан вешина МохьмадсаӀидна нийса дешнаш карийра, хӀора бохург санна тренировке вогӀура, дог иракарахӀоттош, гӀо деш вара. «Иза ца хиллехьара, латар дита тарлора ас», - мукӀарло до Мохьмадхьабиба.

Кадимагомедов дуьххьара баккхийчарна йукъахь гучувелира 2014 шарахь Ботлихехь Абдусаламов Юсупан совгӀаташна дӀайаьхьначу турнирехь, цигахь цо хьалхара меттиг йаьккхира 57 кг йозаллин классехь. КӀира даьлча, иза йуха а хьалавелира пьедесталан лакхарчу гӀулча тӀе, хӀокху ханна Бугленехь Шихсаидов Хизрин совгӀаташна турнирехь, цигахь иза къовсавелира 65 кг категорехь. Оцу толамаша дог иракарахӀоттийра латархочунна, цул тӀаьхьа цо мидалш йаьхна сийлахьчу турнирашкахь, масала, Хаси-Эвлахь Континенташна йукъара кад а, Минскехь Александр Медведь а, Эрмалойчохь Саргсян Степан а, Каспийскехь Ӏали Алиевн мемориалашкахь.

2017-чу шарахь Россин чемпионатехь толам баьккхира цо, ткъа 2020-чу шарахь шен махкахочун бакъо дӀа а йелла, Беларусин цӀарах къовсавала волавелира иза. Цул тӀаьхьа шо даьлча, цо толам баьккхира Европин чемпионатехь а, дуьненан чемпионатехь а, Олимпан ловзаршкахь меттиг а йаьккхина. 2021-чу шарахь Токиорчу Олимпиадехь дети мидал йаьккхира цо, Россера Сидаков Заурбека эшийна.

• ПаргӀата кепара латарехь Российн чемпионат 2017 — 1 !;
• Латарехь дуьненан чемпионат 2017 — 7;
• ПаргӀата кепара латарехь Белоруссин чемпионат 2020 — 1 !;
• Латарехь Европин чемпионат 2020 — 1 !;
• Латарехь индивидуальни дуьненан кад 2020 — 3 !.
• Олимпийн ловзарш 2020 — 2 !;